KHuda taufiq de mujhse kuchh aisa kaam ho jae

ḳhudā taufīq de mujh se kuchh aisā kaam ho jaa.e

ki tere nek bandoñ meñ mirā bhī naam ho jaa.e

jo terā ho gayā us kī lagegī kyā koī qīmat

nazar jis par paḌe terī vahī be-dām ho jaa.e

mire maulā mire haq meñ koī aisā karishma kar

sazā jo bhī mile mujh ko vahī in.aam ho jaa.e

ḳhudā ne tere hāthoñ meñ ajab tāsīr baḳhshī hai

agar tū zahr bhī chhū le to vo bhī jaam ho jaa.e

koī chakkar chalā aisā koī tadbīr aisī kar

naqāb uThne na paa.e aur jalva aam ho jaa.e

dabe vo raaz haiñ dil meñ zamāne ke ḳhudāoñ ke

agar lab khol duuñ apne to qatl-e-ām ho jaa.e

tire pahlū meñ mere rāt-din karvaT badalte haiñ

tire pahlū meñ hī merī sahar se shaam ho jaa.e

agar pardā haTā le tū jamāl-o-husn ke mālik

marīz-e-ishq ko tere zarā ārām ho jaa.e

mujhe to tere sajde meñ hī apnā sar jhukānā hai

balā se phir jo honā ho 'kiran' anjām ho jaa.e

KHuda taufiq de mujh se kuchh aisa kaam ho jae

ki tere nek bandon mein mera bhi nam ho jae

jo tera ho gaya us ki lagegi kya koi qimat

nazar jis par paDe teri wahi be-dam ho jae

mere maula mere haq mein koi aisa karishma kar

saza jo bhi mile mujh ko wahi inam ho jae

KHuda ne tere hathon mein ajab tasir baKHshi hai

agar tu zahr bhi chhu le to wo bhi jam ho jae

koi chakkar chala aisa koi tadbir aisi kar

naqab uThne na pae aur jalwa aam ho jae

dabe wo raaz hain dil mein zamane ke KHudaon ke

agar lab khol dun apne to qatl-e-am ho jae

tere pahlu mein mere raat-din karwaT badalte hain

tere pahlu mein hi meri sahar se sham ho jae

agar parda haTa le tu jamal-o-husn ke malik

mariz-e-ishq ko tere zara aaram ho jae

mujhe to tere sajde mein hi apna sar jhukana hai

bala se phir jo hona ho 'kiran' anjam ho jae