KHuda wo din na dikhae ki sarfaraaz karen

ḳhudā vo din na dikhā.e ki sarfarāz kareñ

fuzūl sher kaheñ aur is pe naaz kareñ

badalne vaalā hai juġhrāfiya gulistāñ kā

giroh-bandī se lāzim hai ehtirāz kareñ

mahābalī kī paḌosī uḌāte haiñ khillī

zamīr bechne vaale na faash raaz kareñ

abhī shikast yaqīnī nahīñ batā do unheñ

mire ḳhilāf abhī aur sāz-bāz kareñ

janāb-e-shaiḳh bhī zālim ke ittihādī haiñ

ye nasl-e-nau ko hidāyat suḳhan-tarāz kareñ

havā-e-shahr hai masmūm hoshiyār raho

ajab nahīñ tumheñ taqsīm chāl-bāz kareñ

anaaj bāñTte phirte haiñ ab vo bastī meñ

jo ḳhair-o-shar meñ yaqīnan na imtiyāz kareñ

ḳhudā ke ḳhauf pe ġhālib vabā kā ḳhauf huā

ye hukm hai ki akele adā namāz kareñ

janāza amn kā niklegā dhuum se ab ke

duā.eñ karte raheñ aap vo niyāz kareñ

KHuda wo din na dikhae ki sarfaraaz karen

fuzul sher kahen aur is pe naz karen

badalne wala hai jughrafiya gulistan ka

giroh-bandi se lazim hai ehtiraaz karen

mahabali ki paDosi uDate hain khilli

zamir bechne wale na fash raaz karen

abhi shikast yaqini nahin bata do unhen

mere KHilaf abhi aur saz-baz karen

janab-e-shaiKH bhi zalim ke ittihadi hain

ye nasl-e-nau ko hidayat suKHan-taraaz karen

hawa-e-shahr hai masmum hoshiyar raho

ajab nahin tumhein taqsim chaal-baz karen

anaj banTte phirte hain ab wo basti mein

jo KHair-o-shar mein yaqinan na imtiyaz karen

KHuda ke KHauf pe ghaalib waba ka KHauf hua

ye hukm hai ki akele ada namaz karen

janaza amn ka niklega dhum se ab ke

duaen karte rahen aap wo niyaz karen