KHudaya bhej de koi dawa udasi ki

ḳhudāyā bhej de koī davā udāsī kī

jahāñ meñ phail rahī hai vabā udāsī kī

mujhe shadīd udāsī kā sāmnā hogā

so merī maañ ne sikhā dī duā udāsī kī

ik aisī shām-e-sitam aa.ī thī sitāroñ ne

saroñ pe oḌhī thī kaalī ridā udāsī kī

na-jāne kaun sā ġham hai miyān-e-dīda-o-dil

barastī rahtī hai paiham ghaTā udāsī kī

namāz-e-ishq musalle pe kab adā huī hai

azā kā farsh yā karb-o-balā udāsī kī

mirī panāh meñ aao ai dard ke maaro

tamām dahr meñ gūñjī sadā udāsī kī

udāsiyoñ kī ināyat hai kār-hā-e-suḳhan

mire liye to jazā hai sazā udāsī kī

ġhamoñ kī dhuup se saa.e meñ aa ga.e 'hāshim'

magar kisī ne na pūchhī 'razā' udāsī kī

KHudaya bhej de koi dawa udasi ki

jahan mein phail rahi hai waba udasi ki

mujhe shadid udasi ka samna hoga

so meri man ne sikha di dua udasi ki

ek aisi sham-e-sitam aai thi sitaron ne

saron pe oDhi thi kali rida udasi ki

na-jaane kaun sa gham hai miyan-e-dida-o-dil

barasti rahti hai paiham ghaTa udasi ki

namaz-e-ishq musalle pe kab ada hui hai

aza ka farsh ya karb-o-bala udasi ki

meri panah mein aao ai dard ke maro

tamam dahr mein gunji sada udasi ki

udasiyon ki inayat hai kar-ha-e-suKHan

mere liye to jaza hai saza udasi ki

ghamon ki dhup se sae mein aa gae 'hashim'

magar kisi ne na puchhi 'raza' udasi ki