KHudi ki fitrat-e-zarrin ke raaz-ha-e-darun

ḳhudī kī fitrat-e-zarrīñ ke rāz-hā-e-darūñ

adā-shanās haqīqat mile koī to kahūñ

ḳhudī agar hai to haiñ surḳh-rū hayāt-o-mamāt

ḳhudī nahīñ to hayāt-o-mamāt ḳhār-o-zabūñ

ḳhudī vo chiiz hai nādāñ ki jis ke badle meñ

mile jo daulat-e-kaunain bhī mujhe to na luuñ

alāmateñ haiñ ye sab ek mard-e-kāmil kī

ḳhulūs-e-rūh o yaqīn-e-tamām o soz-e-darūñ

samajh sakā na samajh kar bhī aaj tak koī

ye āb-o-gil kā fasāna ye āb-o-gil kā fusūñ

mirī nazar meñ hai rāz-e-darūn-e-mai-ḳhāna

magar ye soch rahā huuñ kahūñ to kis se kahūñ

jinheñ talāsh-e-sukūñ hai unheñ ye kyā mālūm

ki ek mahshar-e-ḳhāmosh hai jahān-e-sukūñ

KHudi ki fitrat-e-zarrin ke raaz-ha-e-darun

ada-shanas haqiqat mile koi to kahun

KHudi agar hai to hain surKH-ru hayat-o-mamat

KHudi nahin to hayat-o-mamat KHar-o-zabun

KHudi wo chiz hai nadan ki jis ke badle mein

mile jo daulat-e-kaunain bhi mujhe to na lun

alamaten hain ye sab ek mard-e-kaamil ki

KHulus-e-ruh o yaqin-e-tamam o soz-e-darun

samajh saka na samajh kar bhi aaj tak koi

ye aab-o-gil ka fasana ye aab-o-gil ka fusun

meri nazar mein hai raaz-e-darun-e-mai-KHana

magar ye soch raha hun kahun to kis se kahun

jinhen talash-e-sukun hai unhen ye kya malum

ki ek mahshar-e-KHamosh hai jahan-e-sukun