KHudi ko sabr-o-tahammul se aashna rakhna

ḳhudī ko sabr-o-tahammul se āshnā rakhnā

baḌī he baat baḌā dil kā hausla rakhnā

isī se hai ye mirī zindagī meñ ra.anā.ī

mirā charāġh-e-mohabbat havā jalā rakhnā

nahīñ hai shaan uThā kar akaḌ ke chalne meñ

hamesha sar ko adab se jhukā huā rakhnā

na jaane kaun sā lamha ho us kī aamad kā

ḳhayāl zehn maiñ har vaqt maut kā rakhnā

sañbhāl lenā bulandī pe āsmāñ kī mujhe

mirī uḌaan kī tū aabrū havā rakhnā

tū apne rahm-o-karam se navāz denā hameñ

hamārī laaj tū mahshar meñ ai ḳhudā rakhnā

'zahīr' shukr ḳhudā kā har ek pal lāzim

laboñ ko shām-o-sahar tālib-e-duā rakhnā

KHudi ko sabr-o-tahammul se aashna rakhna

baDi he baat baDa dil ka hausla rakhna

isi se hai ye meri zindagi mein ranai

mera charagh-e-mohabbat hawa jala rakhna

nahin hai shan uTha kar akaD ke chalne mein

hamesha sar ko adab se jhuka hua rakhna

na jaane kaun sa lamha ho us ki aamad ka

KHayal zehn main har waqt maut ka rakhna

sanbhaal lena bulandi pe aasman ki mujhe

meri uDan ki tu aabru hawa rakhna

tu apne rahm-o-karam se nawaz dena hamein

hamari laj tu mahshar mein ai KHuda rakhna

'zahir' shukr KHuda ka har ek pal lazim

labon ko sham-o-sahar talib-e-dua rakhna