khul gaya dida-e-tar se gham-e-pinhan mera

khul gayā dīda-e-tar se ġham-e-pinhāñ merā

ab to rangīñ nazar aatā hai garebāñ merā

zarra zarra mirī nazroñ meñ hai ā.īna-e-husn

kyā dikhātā hai mujhe dīda-e-hairāñ merā

baḌh chalī vahshat-e-dil rahm kar ai josh-e-bahār

ki mire haath se jaatā hai garebāñ merā

tālib-e-dād-e-jafā aur vafā ho kis se

husn mahjūb tirā ishq pashemāñ merā

ḳhatm hai tā-ba-sahar zindagī-e-sham-e-hayāt

ab na muñh dekhegī tū ai shab-e-hijrāñ merā

goshe goshe meñ hai ik hashr-e-salāsil barpā

aaj fariyād se māmūr hai zindāñ merā

maiñ vo ḳhūñ-karda-e-āzār-e-tapish huuñ 'sāqib'

de sakī saath na tūl-e-shab-e-hijrāñ merā

khul gaya dida-e-tar se gham-e-pinhan mera

ab to rangin nazar aata hai gareban mera

zarra zarra meri nazron mein hai aaina-e-husn

kya dikhata hai mujhe dida-e-hairan mera

baDh chali wahshat-e-dil rahm kar ai josh-e-bahaar

ki mere hath se jata hai gareban mera

talib-e-dad-e-jafa aur wafa ho kis se

husn mahjub tera ishq pasheman mera

KHatm hai ta-ba-sahar zindagi-e-sham-e-hayat

ab na munh dekhegi tu ai shab-e-hijran mera

goshe goshe mein hai ek hashr-e-salasil barpa

aaj fariyaad se mamur hai zindan mera

main wo KHun-karda-e-azar-e-tapish hun 'saqib'

de saki sath na tul-e-shab-e-hijran mera