khul gaya shayad bharam ai dil junun ke raaz ka

khul gayā shāyad bharam ai dil junūñ ke raaz kā

badlā badlā sā nazar aatā hai ruḳh dam-sāz kā

gūñjtī hai ab bhī kānoñ meñ sadā-e-bāzgasht

TūTnā dil kā thā ik naġhma shikasta-sāz kā

māh-o-anjum meñ bhī us kā husn jalva-rez hai

āftāb ik aks hai husn-e-karishma-sāz kā

ik parī-ḳhāna hai ye shahr-e-hasīñ lekin yahāñ

koī chehra bhī nazar aayā na us andāz kā

kis qadar rañgīñ hai tartīb-e-kitāb-e-zindagī

is meñ afsāna hai shāyad tere husn-o-nāz kā

shoḳhiyāñ phūloñ se jab karne lagī bād-e-sahar

bārhā dhoka huā hai aap kī āvāz kā

apnā harf-e-ārzū bhī kyā qayāmat hai 'nazīr'

dāstāñ-dar-dāstāñ hai harf harf us raaz kā

khul gaya shayad bharam ai dil junun ke raaz ka

badla badla sa nazar aata hai ruKH dam-saz ka

gunjti hai ab bhi kanon mein sada-e-bazgasht

TuTna dil ka tha ek naghma shikasta-saz ka

mah-o-anjum mein bhi us ka husn jalwa-rez hai

aaftab ek aks hai husn-e-karishma-saz ka

ek pari-KHana hai ye shahr-e-hasin lekin yahan

koi chehra bhi nazar aaya na us andaz ka

kis qadar rangin hai tartib-e-kitab-e-zindagi

is mein afsana hai shayad tere husn-o-naz ka

shoKHiyan phulon se jab karne lagi baad-e-sahar

barha dhoka hua hai aap ki aawaz ka

apna harf-e-arzu bhi kya qayamat hai 'nazir'

dastan-dar-dastan hai harf harf us raaz ka