khul gaya uqda-e-hasti to kafan mang liya

khul gayā uqda-e-hastī to kafan maañg liyā

ziist ne maut se jiine kā chalan maañg liyā

phuuT kar sīna-e-kohsār se bahne ke liye

chashma-e-āb ne dāmān-e-daman maañg liyā

kyā ta.ajjub hai agar maañg lī chehre se naqāb

daur-e-hāzir ne to pairāhan-e-tan maañg liyā

ban gayā halqa-e-zulmat jo paḌā aks-e-zamīñ

chāñd ne ḳhud to nahīñ baḌh ke gahan maañg liyā

jis kī āġhosh meñ maazī kī amānat thī nihāñ

us ne māñgā to vahī qasr-e-kuhan maañg liyā

jalne vāloñ ne bhī shahnāz-e-ġhazal se 'kausar'

husn-e-fan maañg liyā rañg-e-suḳhan maañg liyā

khul gaya uqda-e-hasti to kafan mang liya

zist ne maut se jine ka chalan mang liya

phuT kar sina-e-kohsar se bahne ke liye

chashma-e-ab ne daman-e-daman mang liya

kya tajjub hai agar mang li chehre se naqab

daur-e-hazir ne to pairahan-e-tan mang liya

ban gaya halqa-e-zulmat jo paDa aks-e-zamin

chand ne KHud to nahin baDh ke gahan mang liya

jis ki aaghosh mein mazi ki amanat thi nihan

us ne manga to wahi qasr-e-kuhan mang liya

jalne walon ne bhi shahnaz-e-ghazal se 'kausar'

husn-e-fan mang liya rang-e-suKHan mang liya