khulega naKHun-e-shamshir se uqda mere dil ka

khulegā nāḳhun-e-shamshīr se uqda mire dil kā

kisī qātil se hai āsān honā merī mushkil kā

pas-e-murdan bhī ye manzūr hai nazzāra qātil kā

charāġh-e-gor meñ aalam huā hai chashm-e-bismil kā

ġhubār-e-dahr se ik lahza bhī ḳhālī nahīñ hotā

ilāhī shīsha-e-sā.at hai kyā shīsha mire dil kā

yahī gar zindagī bhar tab-e-ālī kā rahā aalam

banegā mar ga.e par āsmāñ dasvāñ mire gil kā

na toḌe rishta-e-dām aur apnā yaar dam toḌe

hai behtar is bhaḌakne se taḌapnā tā.ir-e-dil kā

jahāñ meñ kāmiloñ ko qadr hai ham ḳhāksāroñ kī

shikast-e-dil-gadā ko TūTnā hai sāġhar-e-gul kā

ajab hai rū-e-jānāñ par na honā ek bhī til kā

adam kartā nahīñ tāroñ ko jalva māh-e-kāmil kā

qayāmat lā.egā gulzār meñ naala anādil kā

jagānā fitna-e-ḳhvābīda hai sayyād-e-ġhāfil kā

maiñ majnūñ dekhte hī mar gayā is rashk-e-lailā ko

kafan ke vāste goyā phaTā thā parda mahmil kā

kiyā labrez-e-marvārīd chashm-e-gauhar afshāñ se

gumāñ guzrā jo dariyā par mujhe dāmān-e-sāhil kā

mirā ḳhvāb-ul-azīz o ġhairat-e-ḳhvāb-e-zuleḳhā hai

tasavvur raat bhar thā mujh ko ik yūsuf-shamā.il kā

maiñ aisā nā-tavāñ huuñ sar uThānā mujh ko mushkil ho

barā-e-tauq gardan chāhiye chhallā anāmil kā

kafan misl-e-katāñ hai TukḌe TukḌe 'arsh' madfan meñ

tasavvur mar ga.e par bhī hai ye us māh-e-kāmil kā

khulega naKHun-e-shamshir se uqda mere dil ka

kisi qatil se hai aasan hona meri mushkil ka

pas-e-murdan bhi ye manzur hai nazzara qatil ka

charagh-e-gor mein aalam hua hai chashm-e-bismil ka

ghubar-e-dahr se ek lahza bhi KHali nahin hota

ilahi shisha-e-saat hai kya shisha mere dil ka

yahi gar zindagi bhar tab-e-ali ka raha aalam

banega mar gae par aasman daswan mere gil ka

na toDe rishta-e-dam aur apna yar dam toDe

hai behtar is bhaDakne se taDapna tair-e-dil ka

jahan mein kaamilon ko qadr hai hum KHaksaron ki

shikast-e-dil-gada ko TuTna hai saghar-e-gul ka

ajab hai ru-e-jaanan par na hona ek bhi til ka

adam karta nahin taron ko jalwa mah-e-kaamil ka

qayamat laega gulzar mein nala anadil ka

jagana fitna-e-KHwabida hai sayyaad-e-ghafil ka

main majnun dekhte hi mar gaya is rashk-e-laila ko

kafan ke waste goya phaTa tha parda mahmil ka

kiya labrez-e-marwarid chashm-e-gauhar afshan se

guman guzra jo dariya par mujhe daman-e-sahil ka

mera KHwab-ul-aziz o ghairat-e-KHwab-e-zuleKHa hai

tasawwur raat bhar tha mujh ko ek yusuf-shamail ka

main aisa na-tawan hun sar uThana mujh ko mushkil ho

bara-e-tauq gardan chahiye chhalla anamil ka

kafan misl-e-katan hai TukDe TukDe 'arsh' madfan mein

tasawwur mar gae par bhi hai ye us mah-e-kaamil ka