khuli hai aankh josh-e-intizar-e-yar-e-jaani hai

khulī hai aañkh josh-e-intizār-e-yār-e-jānī hai

ba-mushkil dīda-e-zanjīr ḳhvāb-e-pāsbānī hai

laboñ par aa chukā dam koī dam kī zindagānī hai

chal uTh o bevafā pahlū se ab kyuuñ mehrbānī hai

lagā duuñ aag uf karne meñ vo sho.ala-zabānī hai

ba-shakl-e-sham.a saare jism meñ soz-e-nihānī hai

kalām-e-hazrat-e-vā.iz nasīb-e-dushmanāñ bāshad

unḌelo mai piyo sāġhar kahāñ phir naujavānī hai

umañgeñ haiñ tabī'at meñ bharī haiñ mastiyāñ dil meñ

huī jaatī haiñ āñkheñ band kaif-e-naujavānī hai

azāb-e-ġhaflat-e-qātil se ranj-e-kash-makash meñ huuñ

madad ai marg-e-be-taqsīr zauq-e-jāñ-fishānī hai

ḳhabar kyā pūchhtā hai ham-nafas kyuuñ kar guzartī hai

jigar jaltā hai dil bhuntā hai ashkoñ kī ravānī hai

adā-o-nāz-e-īmā chashm-e-ġhamza go vo koī ho

ta'alluq jis se ho jaa.e balā-e-nāgahānī hai

pasand aa.ī hai is darja aziyyat dostī ham ko

nazar meñ dhuup bhī dasht-e-musībat ke suhānī hai

ḳhayāl-e-mīrzā.ī ai 'nasīm'-dehlavī kab tak

jhuko buDDhe hue ab ruḳhsat-e-lutf-e-javānī hai

khuli hai aankh josh-e-intizar-e-yar-e-jaani hai

ba-mushkil dida-e-zanjir KHwab-e-pasbani hai

labon par aa chuka dam koi dam ki zindagani hai

chal uTh o bewafa pahlu se ab kyun mehrbani hai

laga dun aag uf karne mein wo shoala-zabani hai

ba-shakl-e-shama sare jism mein soz-e-nihani hai

kalam-e-hazrat-e-waiz nasib-e-dushmanan bashad

unDelo mai piyo saghar kahan phir naujawani hai

umangen hain tabi'at mein bhari hain mastiyan dil mein

hui jati hain aankhen band kaif-e-naujawani hai

azab-e-ghaflat-e-qatil se ranj-e-kash-makash mein hun

madad ai marg-e-be-taqsir zauq-e-jaan-fishani hai

KHabar kya puchhta hai ham-nafas kyun kar guzarti hai

jigar jalta hai dil bhunta hai ashkon ki rawani hai

ada-o-naz-e-ima chashm-e-ghamza go wo koi ho

ta'alluq jis se ho jae bala-e-nagahani hai

pasand aai hai is darja aziyyat dosti hum ko

nazar mein dhup bhi dasht-e-musibat ke suhani hai

KHayal-e-mirzai ai 'nasim'-dehlawi kab tak

jhuko buDDhe hue ab ruKHsat-e-lutf-e-jawani hai