khulti gai ek ek girah nafsiyat ki

khultī ga.ī ik ek girah nafsiyāt kī

juuñ juuñ ġhazal meñ tere havāle se baat kī

dil ne kiyā ḳhulūs se us bevafā ko pyaar

dil ne hamāre saath baḌī vārdāt kī

itnī hī aur baḌh ga.ī bāham muġhā.irat

jitnī nazar ziyāda huī iltifāt kī

ma.alūm ho sakā na kahāñ zindagī milī

joḌī bahut kaḌī se kaḌī vāqi.āt kī

maz.hab kā sirf naam hai varna samāj par

ab tak hai muhr sabt vahī zāt-pāt kī

sach kyā likheñ ki TuuT ga.e sab qalam nadīm

sab raushnā.ī suukh chukī hai davāt kī

ik shaḳhs saath le gayā 'shaukat' shu.ūr-e-vaqt

ab to tamīz din kī rahī hai na raat kī

khulti gai ek ek girah nafsiyat ki

jun jun ghazal mein tere hawale se baat ki

dil ne kiya KHulus se us bewafa ko pyar

dil ne hamare sath baDi wardat ki

itni hi aur baDh gai baham mughairat

jitni nazar ziyaada hui iltifat ki

malum ho saka na kahan zindagi mili

joDi bahut kaDi se kaDi waqiat ki

mazhab ka sirf nam hai warna samaj par

ab tak hai muhr sabt wahi zat-pat ki

sach kya likhen ki TuT gae sab qalam nadim

sab raushnai sukh chuki hai dawat ki

ek shaKHs sath le gaya 'shaukat' shuur-e-waqt

ab to tamiz din ki rahi hai na raat ki