KHulus de ke saza-war nafraton ka hua

ḳhulūs de ke sazā-vār nafratoñ kā huā

na pūchh hashr jo pichhlī rafāqatoñ kā huā

hañse to paḌ ga.iiñ chehre pe kuchh ḳharāsheñ aur

shikār ḳhanda-e-lab kin jarāhatoñ kā huā

kahoge kyā jo tumhārā vo haal pūchhegā

ki pāra-pāra garebāñ shikāyatoñ kā huā

vo ḳhūn-e-dil hī sahī kuchh qalam se Tapkā to

chalo nuzūl to ham par bhī rahmatoñ kā huā

hisār-e-harf-o-hunar toḌ kar nikal jā.ūñ

kahāñ pahuñch ke ḳhayāl apnī vus.atoñ kā huā

chalā thā maiñ ki na.ī āgahī pe kuchh likhkhūñ

tamām silsila barham ibāratoñ kā huā

tū ek lafz hai ma.anī pe ḳhud dalālat kar

rahā bikhar ke jo ḳhūgar vazāhatoñ kā huā

baḌā hunar hai salīqe se baat kahnā bhī

'fazā' ke baad hī itmām hujjatoñ kā huā

KHulus de ke saza-war nafraton ka hua

na puchh hashr jo pichhli rafaqaton ka hua

hanse to paD gain chehre pe kuchh KHarashen aur

shikar KHanda-e-lab kin jarahaton ka hua

kahoge kya jo tumhaara wo haal puchhega

ki para-para gareban shikayaton ka hua

wo KHun-e-dil hi sahi kuchh qalam se Tapka to

chalo nuzul to hum par bhi rahmaton ka hua

hisar-e-harf-o-hunar toD kar nikal jaun

kahan pahunch ke KHayal apni wusaton ka hua

chala tha main ki nai aagahi pe kuchh likhkhun

tamam silsila barham ibaraton ka hua

tu ek lafz hai mani pe KHud dalalat kar

raha bikhar ke jo KHugar wazahaton ka hua

baDa hunar hai saliqe se baat kahna bhi

'faza' ke baad hi itmam hujjaton ka hua