KHulus pyar ka ab koi silsila bhi nahin

ḳhulūs pyaar kā ab koī silsila bhī nahīñ

diloñ ke biich vo pahlā sā rābta bhī nahīñ

hamārā un kā koī ab to vāsta bhī nahīñ

kuchh is tarah se alag haiñ ki tazkira bhī nahīñ

maiñ dekhtā huuñ tamāsha vo khiñch rahe haiñ bahut

kamāl ye hai kashīda mo.āmla bhī nahīñ

ajab sukūt hai taarī ḳhamosh haiñ donoñ

na un ko koī shikāyat mujhe gila bhī nahīñ

ab aise moḌ pe aakar alag alag haiñ khaḌe

qarīb-tar bhī nahīñ aur fāsla bhī nahīñ

na raushnī na añdherā ajiib manzar hai

tulū-e-sub.h nahīñ shaam ab siyah bhī nahīñ

sune to koī zarā hosh-o-gosh se ik din

hamārī baat kā mafhūm bad-maza bhī nahīñ

kisī se koī shikāyat nahīñ ye dil merā

jo ḳhush-nasīb nahīñ hai to ġham-zada bhī nahīñ

batā.e 'yās' ki is dil ko kis se deñ tashbīh

nahīñ hai sang-sifat to gudāḳhta bhī nahīñ

KHulus pyar ka ab koi silsila bhi nahin

dilon ke bich wo pahla sa rabta bhi nahin

hamara un ka koi ab to wasta bhi nahin

kuchh is tarah se alag hain ki tazkira bhi nahin

main dekhta hun tamasha wo khinch rahe hain bahut

kamal ye hai kashida moamla bhi nahin

ajab sukut hai tari KHamosh hain donon

na un ko koi shikayat mujhe gila bhi nahin

ab aise moD pe aakar alag alag hain khaDe

qarib-tar bhi nahin aur fasla bhi nahin

na raushni na andhera ajib manzar hai

tulu-e-subh nahin sham ab siyah bhi nahin

sune to koi zara hosh-o-gosh se ek din

hamari baat ka mafhum bad-maza bhi nahin

kisi se koi shikayat nahin ye dil mera

jo KHush-nasib nahin hai to gham-zada bhi nahin

batae 'yas' ki is dil ko kis se den tashbih

nahin hai sang-sifat to gudaKHta bhi nahin