KHumar-e-KHwab mujhe fursat-e-guman tak hai

ḳhumār-e-ḳhvāb mujhe fursat-e-gumāñ tak hai

gul-e-siyāh kī ḳhushbū shab-e-ravāñ tak hai

maiñ roz parda-e-shām-o-sahar ko dekhtā huuñ

ye intizār-e-nazar jalva-e-nihāñ tak hai

kahāñ vo ḳhvāb sī ḳhvāhish jo dil meñ rahtī thī

kahāñ ye sail-e-balā jo kanār-e-jāñ tak hai

laraz rahe haiñ sitāre ki dil dhaḌaktā hai

jo bojh ham pe hai vo dosh-e-āsmāñ tak hai

lahū meñ zā.iqa phirtā hai tere bosoñ kā

mire badan pe tire lams kā nishāñ tak hai

suḳhan se baḌh ke kahūñ aur kuchh bhī kah na sakūñ

ye merā ‘ijz-e-bayāñ hāsil-e-bayāñ tak hai

ka.ī zamāne taḌapte haiñ mere lahje meñ

ye merā giryā-e-jāñ ḳhāk-e-raftagāñ tak hai

kuchh aur der tamāshā-e-āb-o-gil hai yahāñ

sabāt-e-shīsha-e-jāñ sang-e-nāgahāñ tak hai

banā rahā huuñ maiñ sat.h-e-‘adam pe tasvīreñ

ye merā 'aib-e-hunar shauq-e-rā.egāñ tak hai

vo aur log haiñ jo mujh se milne aate haiñ

mire makān kā dar shahr-e-lā-makāñ tak hai

huī hai naqsh nigār-e-lahū meñ goyā.ī

ki zaḳhm-e-harf mirā bandish-e-zabāñ tak hai

azal se maiñ to tirā banda-e-fanā huuñ magar

ye zo'm-e-ḳhalq tirā yā-ḳhudā kahāñ tak hai

hamāre ranj tirī dilbarī kī rasmeñ haiñ

ḳhushī hamārī tirī zeb-e-dāstāñ tak hai

kuchh is se aage faqīr-e-suḳhan kā takiya hai

ye shor-e-dād-o-talab she'r kī dukāñ tak hai

kise farāġhat-e-nāz-o-adā yahāñ 'sarmad'

ġhurūr-e-shāhid-e-gul sehn-e-gulsitāñ tak hai

KHumar-e-KHwab mujhe fursat-e-guman tak hai

gul-e-siyah ki KHushbu shab-e-rawan tak hai

main roz parda-e-sham-o-sahar ko dekhta hun

ye intizar-e-nazar jalwa-e-nihan tak hai

kahan wo KHwab si KHwahish jo dil mein rahti thi

kahan ye sail-e-bala jo kanar-e-jaan tak hai

laraz rahe hain sitare ki dil dhaDakta hai

jo bojh hum pe hai wo dosh-e-asman tak hai

lahu mein zaiqa phirta hai tere boson ka

mere badan pe tere lams ka nishan tak hai

suKHan se baDh ke kahun aur kuchh bhi kah na sakun

ye mera ‘ijz-e-bayan hasil-e-bayan tak hai

kai zamane taDapte hain mere lahje mein

ye mera girya-e-jaan KHak-e-raftagan tak hai

kuchh aur der tamasha-e-ab-o-gil hai yahan

sabaat-e-shisha-e-jaan sang-e-nagahan tak hai

bana raha hun main sath-e-‘adam pe taswiren

ye mera 'aib-e-hunar shauq-e-raegan tak hai

wo aur log hain jo mujh se milne aate hain

mere makan ka dar shahr-e-la-makan tak hai

hui hai naqsh nigar-e-lahu mein goyai

ki zaKHm-e-harf mera bandish-e-zaban tak hai

azal se main to tera banda-e-fana hun magar

ye zo'm-e-KHalq tera ya-KHuda kahan tak hai

hamare ranj teri dilbari ki rasmen hain

KHushi hamari teri zeb-e-dastan tak hai

kuchh is se aage faqir-e-suKHan ka takiya hai

ye shor-e-dad-o-talab she'r ki dukan tak hai

kise faraghat-e-naz-o-ada yahan 'sarmad'

ghurur-e-shahid-e-gul sehn-e-gulsitan tak hai