KHush bahut hai ki KHush-guman bhi to hai

ḳhush bahut hai ki ḳhush-gumāñ bhī to hai

rabt donoñ ke darmiyāñ bhī to hai

sar se pā tak vo ātish-e-ḳhāmosh

dīda-e-nam dhuāñ dhuāñ bhī to hai

ḳhema jalne kā rāz-e-sar-basta

koī dar-parda mehrbāñ bhī to hai

shāḳh-sāroñ pe e'timād bhī kam

chaar tinkoñ kā āshiyāñ bhī to hai

tez chalne pe iḳhtiyār sahī

ham-safar koī nā-tavāñ bhī to hai

hai qabīle meñ intishār bahut

sar-phiroñ kā ye kārvāñ bhī to hai

yaañ ki farshī salām hai mamnūa

ye faqīroñ kā āstāñ bhī to hai

kab kashish thī bayāñ meñ yuuñ 'afzal'

ye shab-e-ġham kī dāstāñ bhī to hai

KHush bahut hai ki KHush-guman bhi to hai

rabt donon ke darmiyan bhi to hai

sar se pa tak wo aatish-e-KHamosh

dida-e-nam dhuan dhuan bhi to hai

KHema jalne ka raaz-e-sar-basta

koi dar-parda mehrban bhi to hai

shaKH-saron pe e'timad bhi kam

chaar tinkon ka aashiyan bhi to hai

tez chalne pe iKHtiyar sahi

ham-safar koi na-tawan bhi to hai

hai qabile mein intishaar bahut

sar-phiron ka ye karwan bhi to hai

yan ki farshi salam hai mamnua

ye faqiron ka aastan bhi to hai

kab kashish thi bayan mein yun 'afzal'

ye shab-e-gham ki dastan bhi to hai