KHush-kun nazar fareb sa manzar bhi aaega

ḳhush-kun nazar fareb sā manzar bhī aa.egā

chal aur thoḌī duur tirā ghar bhī aa.egā

hogā ye hādisa bhī kabhī mere shahr meñ

ā.īna-gar ke haath meñ patthar bhī aa.egā

kyoñ ishti.āl rakhtā hai lamhoñ kī kokh meñ

patthar ke phir javāb meñ ḳhanjar bhī aa.egā

paanī meñ kaun kitne hai sab kī mujhe ḳhabar

majbūr gar karoge to lab par bhī aa.egā

boyā hai nuur maiñ ne añdheroñ meñ raat ke

niklā vo chāñd ban ke mire ghar bhī aa.egā

tāroñ ne baar baar mujhe diiñ tasalliyāñ

vo chāñd hai to raat ko chhat par bhī aa.egā

vo aarzū vo shauq vo chāhat nahīñ rahī

ilzām ek din ye mire sar bhī aa.egā

jā to rahā hai ret meñ kushtī ko chhoḌ ke

sahrā ko paar karke samundar bhī aa.egā

yād-e-ḳhizāñ meñ zikr kiye jā bahār kā

lutf-e-bahār kuchh mujhe sun kar bhī aa.egā

'mohsin' meñ tīrgī meñ use kyoñ pukārtā

sūraj hai vo to raushnī le kar bhī aa.egā

KHush-kun nazar fareb sa manzar bhi aaega

chal aur thoDi dur tera ghar bhi aaega

hoga ye hadisa bhi kabhi mere shahr mein

aaina-gar ke hath mein patthar bhi aaega

kyon ishtial rakhta hai lamhon ki kokh mein

patthar ke phir jawab mein KHanjar bhi aaega

pani mein kaun kitne hai sab ki mujhe KHabar

majbur gar karoge to lab par bhi aaega

boya hai nur main ne andheron mein raat ke

nikla wo chand ban ke mere ghar bhi aaega

taron ne bar bar mujhe din tasalliyan

wo chand hai to raat ko chhat par bhi aaega

wo aarzu wo shauq wo chahat nahin rahi

ilzam ek din ye mere sar bhi aaega

ja to raha hai ret mein kushti ko chhoD ke

sahra ko par karke samundar bhi aaega

yaad-e-KHizan mein zikr kiye ja bahaar ka

lutf-e-bahaar kuchh mujhe sun kar bhi aaega

'mohsin' mein tirgi mein use kyon pukarta

suraj hai wo to raushni le kar bhi aaega