KHush-nazar hai na KHush-KHayal hai ye

ḳhush-nazar hai na ḳhush-ḳhayāl hai ye

aaj ke dīda-var kā haal hai ye

tum mire dil meñ kyuuñ nahīñ aate

shahr-e-ra.anā.ī-e-jamāl hai ye

mere chehre pe kuchh nahīñ tahrīr

sirf unvān-e-arz-e-hāl hai ye

vaj.h-e-nākāmī-e-vafā kyā hai

aap se āḳhirī savāl hai ye

chāhte bhī haiñ chāhte bhī nahīñ

dostī kī na.ī misāl hai ye

kaise sulgheñge kākul-e-daurāñ

kitnā uljhā huā savāl hai ye

kaun jaane uruuj kyā hogā

aadmī kā agar zavāl hai ye

DhūñDhtā hai na.ī na.ī uftād

dil-e-īzā-talab kā haal hai ye

is zamāne meñ pāk-dāmānī

amr mumkin nahīñ muhāl hai ye

ab koī aañkh nam nahīñ hotī

dil kī duniyā meñ ḳhushk saal hai ye

KHush-nazar hai na KHush-KHayal hai ye

aaj ke dida-war ka haal hai ye

tum mere dil mein kyun nahin aate

shahr-e-ranai-e-jamal hai ye

mere chehre pe kuchh nahin tahrir

sirf unwan-e-arz-e-haal hai ye

wajh-e-nakaami-e-wafa kya hai

aap se aaKHiri sawal hai ye

chahte bhi hain chahte bhi nahin

dosti ki nai misal hai ye

kaise sulghenge kakul-e-dauran

kitna uljha hua sawal hai ye

kaun jaane uruj kya hoga

aadmi ka agar zawal hai ye

DhunDhta hai nai nai uftad

dil-e-iza-talab ka haal hai ye

is zamane mein pak-damani

amr mumkin nahin muhaal hai ye

ab koi aankh nam nahin hoti

dil ki duniya mein KHushk sal hai ye