KHusha-qismat tumhein is dil mein mehman kar diya humne

ḳhushā-qismat tumheñ is dil meñ mehmāñ kar diyā ham ne

tum aa.e to bayābāñ ko gulistāñ kar diyā ham ne

mirī vīrānī-e-dil par ye ik ehsāñ tumhārā hai

tum utre dil meñ jab dil ko bayābāñ kar diyā ham ne

chaman kī tīrgī jab ho ga.ī bardāsht se bāhar

nasheman phūñk kar apnā charāġhāñ kar diyā ham ne

mirī dīvāngī phir bhī na raas aa.ī zamāne ko

dikhāne zaḳhm-e-dil chāk-e-garebāñ kar diyā ham ne

taġhāful meñ zarūr us ke rahīñ majbūriyāñ shāmil

isī ḳhush-fahmī se jiine kā sāmāñ kar diyā ham ne

mohabbat kā bhram qaa.em rahā furqat meñ ḳhush rah kar

'hasan' ḳhud par bhī un par bhī ye ehsāñ kar diyā ham ne

KHusha-qismat tumhein is dil mein mehman kar diya hum ne

tum aae to bayaban ko gulistan kar diya hum ne

meri virani-e-dil par ye ek ehsan tumhaara hai

tum utre dil mein jab dil ko bayaban kar diya hum ne

chaman ki tirgi jab ho gai bardasht se bahar

nasheman phunk kar apna charaghan kar diya hum ne

meri diwangi phir bhi na ras aai zamane ko

dikhane zaKHm-e-dil chaak-e-gareban kar diya hum ne

taghaful mein zarur us ke rahin majburiyan shamil

isi KHush-fahmi se jine ka saman kar diya hum ne

mohabbat ka bhram qaem raha furqat mein KHush rah kar

'hasan' KHud par bhi un par bhi ye ehsan kar diya hum ne