KHushbuon ki dasht se hamsaegi taDpaegi

ḳhushbuoñ kī dasht se hamsā.egī taḌpā.egī

jis ko bhī hāsil huī ye āgahī taḌpā.egī

raushnī ko guñg hote jis ne dekhā ho kabhī

kis havāle se use tīra-shabī taḌpā.egī

kāḌhtā thā maiñ hī sañg-e-saḳht par resham se phuul

kyā ḳhabar thī ye nazar shā.istagī taḌpā.egī

ḳhvāb the pāyāb is kā dukh nahīñ kab thī ḳhabar

mujh ko ta.abīroñ kī ik be-qāmatī taḌpā.egī

maiñ na kahtā thā ki sho.aloñ se na karnā dostī

maiñ na kahtā thā ki ye dariyā-dilī taḌpā.egī

zāviya-dar-zāviya manzar badalte jā.eñge

aañkh saarī aañkh bhar ye zindagī taḌpā.egī

naġhme chup haiñ aur rut bhī kah rahī hai chup raho

kis ko ab dil kī ye nā-āsūdgī taḌpā.egī

aur ik din dasht bādal se churā.eñge nazar

aur mujh ko is kī ye be-ḳhāngī taḌpā.egī

kuchh na kuchh 'manzūr' dil se rābta rah jā.egā

us ko mujh se dostī yā dushmanī taḌpā.egī

KHushbuon ki dasht se hamsaegi taDpaegi

jis ko bhi hasil hui ye aagahi taDpaegi

raushni ko gung hote jis ne dekha ho kabhi

kis hawale se use tira-shabi taDpaegi

kaDhta tha main hi sang-e-saKHt par resham se phul

kya KHabar thi ye nazar shaistagi taDpaegi

KHwab the payab is ka dukh nahin kab thi KHabar

mujh ko tabiron ki ek be-qamati taDpaegi

main na kahta tha ki shoalon se na karna dosti

main na kahta tha ki ye dariya-dili taDpaegi

zawiya-dar-zawiya manzar badalte jaenge

aankh sari aankh bhar ye zindagi taDpaegi

naghme chup hain aur rut bhi kah rahi hai chup raho

kis ko ab dil ki ye na-asudgi taDpaegi

aur ek din dasht baadal se churaenge nazar

aur mujh ko is ki ye be-KHangi taDpaegi

kuchh na kuchh 'manzur' dil se rabta rah jaega

us ko mujh se dosti ya dushmani taDpaegi