KHushbu ka jism nur ka paikar badal gaya

ḳhushbū kā jism nuur kā paikar badal gayā

shabnam kī sard aag se patthar pighal gayā

titlī ke pīchhe dauḌte bachche ko kyā milā

hāthoñ meñ rañg rah gayā paañv phisal gayā

āñchal meñ dhuup zulf meñ sho.aloñ kī aañch hai

jaa.eñ kahāñ ki pyaar kā mausam badal gayā

maazī kī ḳhānqāh se bāhar to dekhiye

ḳhvāboñ kī rut chalī ga.ī sikka badal gayā

apnā sā ye koī pas-e-ā.īna kaun hai

āñkhoñ meñ aaj kis liye sāvan machal gayā

dīvāna chīḳh chīḳh ke malbe pe so gayā

pichhle baras yahīñ thā mirā ghar ki jal gayā

phir aaj us ke lams meñ jakḌā huā huuñ maiñ

phir aaj ḳhvāhishoñ kā samundar ubal gayā

KHushbu ka jism nur ka paikar badal gaya

shabnam ki sard aag se patthar pighal gaya

titli ke pichhe dauDte bachche ko kya mila

hathon mein rang rah gaya panw phisal gaya

aanchal mein dhup zulf mein shoalon ki aanch hai

jaen kahan ki pyar ka mausam badal gaya

mazi ki KHanqah se bahar to dekhiye

KHwabon ki rut chali gai sikka badal gaya

apna sa ye koi pas-e-aina kaun hai

aankhon mein aaj kis liye sawan machal gaya

diwana chiKH chiKH ke malbe pe so gaya

pichhle baras yahin tha mera ghar ki jal gaya

phir aaj us ke lams mein jakDa hua hun main

phir aaj KHwahishon ka samundar ubal gaya