KHushbu mere badan mein rachi hai KHalaon ki

ḳhushbū mire badan meñ rachī hai ḳhalāoñ kī

maiñ sair kar rahā huuñ abhī tak fazāoñ kī

mat rok apne lab pe nazar kī haqīqateñ

terī har ik sadā hai amānat havāoñ kī

hai kaun jo karegā sadāqat se mol-tol

qīmat talab karūñ bhī to kis se vafāoñ kī

uTThī haiñ is tarah se havādis kī āñdhiyāñ

miTTī meñ taab mil ga.ī rañgīñ qabāoñ kī

shahroñ meñ aa ke nuur ke sāñche meñ Dhal ga.ī

miTTī vahī ki raakh thī galiyoñ meñ gaañv kī

'betāb' aaj DhūñDne nikleñ kidhar amaañ

ab shahr shahr ban chukā bastī balāoñ kī

KHushbu mere badan mein rachi hai KHalaon ki

main sair kar raha hun abhi tak fazaon ki

mat rok apne lab pe nazar ki haqiqaten

teri har ek sada hai amanat hawaon ki

hai kaun jo karega sadaqat se mol-tol

qimat talab karun bhi to kis se wafaon ki

uTThi hain is tarah se hawadis ki aandhiyan

miTTi mein tab mil gai rangin qabaon ki

shahron mein aa ke nur ke sanche mein Dhal gai

miTTi wahi ki rakh thi galiyon mein ganw ki

'betab' aaj DhunDne niklen kidhar aman

ab shahr shahr ban chuka basti balaon ki