KHushbu se ho saka na wo manus aaj tak

ḳhushbū se ho sakā na vo mānūs aaj tak

kāñToñ ke nashtaroñ meñ hai malbūs aaj tak

kirnoñ kī dāstān sunā.egā ek din

ḳhāmosh jhūltā hai jo fānūs aaj tak

bastī meñ baT rahī thī hañsī bhī hisāb se

shashdar khaḌā hai sochtā kanjūs aaj tak

lafzoñ kī narmiyoñ se khulā chāñd is tarah

kartī huuñ us kī raushnī mahsūs aaj tak

rañg-e-chaman se vāsta us ko kahāñ rahā

raqs-e-junūñ meñ gum hai jo tā.ūs aaj tak

kajlā ga.ī hai raushnī garche charāġh kī

lekin nahīñ huuñ aas se māyūs aaj tak

kis tarah aadmī kā pata pā.egī 'sadaf'

jañgal meñ shar ke hai ghirā jāsūs aaj tak

KHushbu se ho saka na wo manus aaj tak

kanTon ke nashtaron mein hai malbus aaj tak

kirnon ki dastan sunaega ek din

KHamosh jhulta hai jo fanus aaj tak

basti mein baT rahi thi hansi bhi hisab se

shashdar khaDa hai sochta kanjus aaj tak

lafzon ki narmiyon se khula chand is tarah

karti hun us ki raushni mahsus aaj tak

rang-e-chaman se wasta us ko kahan raha

raqs-e-junun mein gum hai jo taus aaj tak

kajla gai hai raushni garche charagh ki

lekin nahin hun aas se mayus aaj tak

kis tarah aadmi ka pata paegi 'sadaf'

jangal mein shar ke hai ghira jasus aaj tak