KHushi ki had ghamon ki intiha malum hoti hai

ḳhushī kī had ġhamoñ kī intihā ma.alūm hotī hai

ḳhudā jaane mohabbat kyā hai kyā ma.alūm hotī hai

jahāñ kā zarra zarra yuuñ to zer-e-hukm-e-fitrat hai

magar ye husn kī duniyā judā ma.alūm hotī hai

tavaqqo un ke aane kī na ummīd-e-ajal phir kyoñ

har ik hasrat tabassum-āshnā ma.alūm hotī hai

baḌī halchal machī hai aaj dil vāloñ kī duniyā meñ

tirī nazroñ meñ shān-e-iltijā ma.alūm hotī hai

sanā-e-husn tausīf-e-adā tārīf-e-dil-jūī

ye sab tamhīd-e-arz-e-mudda.ā ma.alūm hotī hai

ye takmīl-e-mohabbat hai ki taufīq-e-ḳhudāvandī

mujhe har intihā ab ibtidā ma.alūm hotī hai

agar maa.il ye pastī hai mohabbat ahd-e-āsī hai

jo us kī rif.ateñ dekho ḳhudā ma.alūm hotī hai

bas ai chashm-e-talattuf bas ki dard-e-āshnā ho kar

mire jazbāt se nā-āshnā ma.alūm hotī hai

mohabbat ek hai lekin asar ziddain rakhtī hai

kahīñ rahzan kisī jā rahnumā ma.alūm hotī

jigar TukḌe huā jaatā hai har āvāz par is kī

'munīr'-e-be-navā kī ye sadā ma.alūm hotī he

KHushi ki had ghamon ki intiha malum hoti hai

KHuda jaane mohabbat kya hai kya malum hoti hai

jahan ka zarra zarra yun to zer-e-hukm-e-fitrat hai

magar ye husn ki duniya juda malum hoti hai

tawaqqo un ke aane ki na ummid-e-ajal phir kyon

har ek hasrat tabassum-ashna malum hoti hai

baDi halchal machi hai aaj dil walon ki duniya mein

teri nazron mein shan-e-iltija malum hoti hai

sana-e-husn tausif-e-ada tarif-e-dil-jui

ye sab tamhid-e-arz-e-muddaa malum hoti hai

ye takmil-e-mohabbat hai ki taufiq-e-KHudawandi

mujhe har intiha ab ibtida malum hoti hai

agar mail ye pasti hai mohabbat ahd-e-asi hai

jo us ki rifaten dekho KHuda malum hoti hai

bas ai chashm-e-talattuf bas ki dard-e-ashna ho kar

mere jazbaat se na-ashna malum hoti hai

mohabbat ek hai lekin asar ziddain rakhti hai

kahin rahzan kisi ja rahnuma malum hoti

jigar TukDe hua jata hai har aawaz par is ki

'munir'-e-be-nawa ki ye sada malum hoti he