KHushi ki mili ye saza rafta rafta

ḳhushī kī milī ye sazā rafta rafta

ta.āruf ġhamoñ se huā rafta rafta

thī chehre kī rañgat to nazroñ ke aage

chalā rañg dil kā pata rafta rafta

bhalā.ī kiye jā yaqīñ rab pe rakh kar

vo detā hai sab ko sila rafta rafta

sunī bhūke bachche ne jab maañ kī lorī

to ro ro ke vo so gayā rafta rafta

tire bin bhī kaT jā.egī umr lekin

chhuḌā apnā dāman zarā rafta rafta

nazar jo milī dil huā raakh jal kar

dhuāñ phir usī se uThā rafta rafta

chaman meñ khilīñ hañste hañste jo kaliyāñ

to ḳhushbū se mahkī fazā rafta rafta

na ghabrāo 'monā' pareshāniyoñ se

asar lā.egī har duā rafta rafta

KHushi ki mili ye saza rafta rafta

taaruf ghamon se hua rafta rafta

thi chehre ki rangat to nazron ke aage

chala rang dil ka pata rafta rafta

bhalai kiye ja yaqin rab pe rakh kar

wo deta hai sab ko sila rafta rafta

suni bhuke bachche ne jab man ki lori

to ro ro ke wo so gaya rafta rafta

tere bin bhi kaT jaegi umr lekin

chhuDa apna daman zara rafta rafta

nazar jo mili dil hua rakh jal kar

dhuan phir usi se uTha rafta rafta

chaman mein khilin hanste hanste jo kaliyan

to KHushbu se mahki faza rafta rafta

na ghabrao 'mona' pareshaniyon se

asar laegi har dua rafta rafta