KHushi mein yun izafa kar liya hai

ḳhushī meñ yuuñ izāfa kar liyā hai

bahut sā ġham ikaTThā kar liyā hai

hameñ ham se bachāne kaun aatā

so ab ḳhud se kināra kar liyā hai

mirī tanhā.ī kā 'ālam to dekho

zamāne bhar ko yakjā kar liyā hai

tujhe jaane kī jaldī thī so ḳhud se

tire hisse kā shikva kar liyā hai

nahīñ māñgeñge tujh ko ab du'ā meñ

ḳhudā se ham ne jhagḌā kar liyā hai

taraste haiñ jise milne kī ḳhātir

usī ko apnī duniyā kar liyā hai

vo kyā hai 'ishq ham ne ab kī jānāñ

takalluf meñ ziyāda kar liyā hai

añdheroñ meñ to rakhte hī the ḳhud ko

ujāloñ meñ bhī tanhā kar liyā hai

khule piñjre meñ bhī jis ko hai vahshat

ye dil aisā parinda kar liyā hai

KHushi mein yun izafa kar liya hai

bahut sa gham ikaTTha kar liya hai

hamein hum se bachane kaun aata

so ab KHud se kinara kar liya hai

meri tanhai ka 'alam to dekho

zamane bhar ko yakja kar liya hai

tujhe jaane ki jaldi thi so KHud se

tere hisse ka shikwa kar liya hai

nahin mangenge tujh ko ab du'a mein

KHuda se hum ne jhagDa kar liya hai

taraste hain jise milne ki KHatir

usi ko apni duniya kar liya hai

wo kya hai 'ishq hum ne ab ki jaanan

takalluf mein ziyaada kar liya hai

andheron mein to rakhte hi the KHud ko

ujalon mein bhi tanha kar liya hai

khule pinjre mein bhi jis ko hai wahshat

ye dil aisa parinda kar liya hai