KHushi mile bhi to chehra nahin badalte hain

ḳhushī mile bhī to chehra nahīñ badalte haiñ

ki ham kabhī saf-e-girya nahīñ badalte haiñ

mujhe yaqīn hai duniyā zarūr badleñge

jo iḳhtilāf pe lahja nahīñ badalte haiñ

na jaane kaun musībat meñ kaam aa jaa.e

kisī ke saath ravayya nahīñ badalte haiñ

jinheñ bahut hai ibārat ke fan se āgāhī

tirā likhā huā jumla nahīñ badalte haiñ

purānī ādateñ pahchān ban ga.iiñ merī

so ḳhud ko itnā ziyāda nahīñ badalte haiñ

samajh rahe haiñ parinde qafas ko ghar apnā

shikārī is liye piñjra nahīñ badalte haiñ

ḳhudā mujhe bhī atā kar de aise dost ki jo

charāġh bujhne pe ḳhema nahīñ badalte haiñ

tujhe pata nahīñ ahd-e-jadīd ke ushshāq

junūñ bhī aa.e to huliya nahīñ badalte haiñ

tū zindagī ko badalne kī baat kartā hai

ham us ke hijr meñ hujra nahīñ badalte haiñ

KHushi mile bhi to chehra nahin badalte hain

ki hum kabhi saf-e-girya nahin badalte hain

mujhe yaqin hai duniya zarur badlenge

jo iKHtilaf pe lahja nahin badalte hain

na jaane kaun musibat mein kaam aa jae

kisi ke sath rawayya nahin badalte hain

jinhen bahut hai ibarat ke fan se aagahi

tera likha hua jumla nahin badalte hain

purani aadaten pahchan ban gain meri

so KHud ko itna ziyaada nahin badalte hain

samajh rahe hain parinde qafas ko ghar apna

shikari is liye pinjra nahin badalte hain

KHuda mujhe bhi ata kar de aise dost ki jo

charagh bujhne pe KHema nahin badalte hain

tujhe pata nahin ahd-e-jadid ke ushshaq

junun bhi aae to huliya nahin badalte hain

tu zindagi ko badalne ki baat karta hai

hum us ke hijr mein hujra nahin badalte hain