KHushi se khel gae hum qaza ke daman par

ḳhushī se khel ga.e ham qazā ke dāman par

ki harf aane na paa.e vafā ke dāman par

hamāre ḳhuun ke qatre girā ke dāman par

ik aur daaġh lagāyā vafā ke dāman par

ilāhī aisī ghaTā mai-kade meñ chhā jaa.e

ki tauba TuuTe mirī pārsā ke dāman par

qudūm-e-nāz kā ehsāñ pas-e-fanā bhī rahā

uḌaa.ī ḳhāk-e-lahad bhī havā ke dāman par

bhalā miTā.e se miTtā bhī hai nishān us kā

hazār ḳhaak vo Dāleñ vafā ke dāman par

na bach sakā hai koī aur na bach sakegā koī

hai qabza maut kā shāh-o-gadā ke dāman par

mire karīm ne aisā mujhe navāz diyā

machal rahī hai ijābat duā ke dāman par

tire karam ne banāyā hamārī bigḌī ko

vagarna daaġh the lākhoñ ḳhatā ke dāman par

'shafī.a' jāma-e-hastī bhī tār-tār kiyā

junūñ ne haath ko apne baḌhā ke dāman par

KHushi se khel gae hum qaza ke daman par

ki harf aane na pae wafa ke daman par

hamare KHun ke qatre gira ke daman par

ek aur dagh lagaya wafa ke daman par

ilahi aisi ghaTa mai-kade mein chha jae

ki tauba TuTe meri parsa ke daman par

qudum-e-naz ka ehsan pas-e-fana bhi raha

uDai KHak-e-lahad bhi hawa ke daman par

bhala miTae se miTta bhi hai nishan us ka

hazar KHak wo Dalen wafa ke daman par

na bach saka hai koi aur na bach sakega koi

hai qabza maut ka shah-o-gada ke daman par

mere karim ne aisa mujhe nawaz diya

machal rahi hai ijabat dua ke daman par

tere karam ne banaya hamari bigDi ko

wagarna dagh the lakhon KHata ke daman par

'shafia' jama-e-hasti bhi tar-tar kiya

junun ne hath ko apne baDha ke daman par