KHushk aankhon ki kahani dasht dasht apni hi thi

ḳhushk āñkhoñ kī kahānī dasht dasht apnī hī thī

nam havāoñ meñ sadā-e-bāzgasht apnī hī thī

DhūñDte phirte rahe the saaya saaya zindagī

dhuup kī galiyoñ meñ sub.h-o-shām gasht apnī hī thī

jāgtī rahtī thiiñ āñkheñ ḳhāna ḳhāna ḳhauf ḳhauf

ḳhvāb kī raushan-numā.ī tasht tasht apnī hī thī

jañgaloñ se shahr tak shāna-ba-shāna pusht pusht

silsila kartī huī vo sar-guzasht apnī hī thī

merī ḳhush-taba.ī na thī rū-e-ġharīb-e-shahr haañ

shahr-yāroñ meñ muzavvaj ḳhū-e-zasht apnī hī thī

karte the 'parvez' 'rahmānī' ujāle gul-kashīd

shab-girafta vādiyoñ meñ ḳhār-gasht apnī hī thī

KHushk aankhon ki kahani dasht dasht apni hi thi

nam hawaon mein sada-e-bazgasht apni hi thi

DhunDte phirte rahe the saya saya zindagi

dhup ki galiyon mein subh-o-sham gasht apni hi thi

jagti rahti thin aankhen KHana KHana KHauf KHauf

KHwab ki raushan-numai tasht tasht apni hi thi

jangalon se shahr tak shana-ba-shana pusht pusht

silsila karti hui wo sar-guzasht apni hi thi

meri KHush-tabai na thi ru-e-gharib-e-shahr han

shahr-yaron mein muzawwaj KHu-e-zasht apni hi thi

karte the 'parwez' 'rahmani' ujale gul-kashid

shab-girafta wadiyon mein KHar-gasht apni hi thi