KHushk lamhat ke dariya mein baha de mujhko

ḳhushk lamhāt ke dariyā meñ bahā de mujh ko

marg-e-ehsās kī suulī pe chaḌhā de mujh ko

kaun aa kar tire insāf kā misdāq bane

be-gunāhī pe agar tū na sazā de mujh ko

ek pal meñ ye mirā rañg uḌā dete haiñ

raas aate nahīñ ḳhush-rañg libāde mujh ko

yuuñ mujhe dekh ke chehra na chhupā hāthoñ se

maiñ tirā jism-e-barahna huuñ qabā de mujh ko

na milī kūcha-o-bāzār meñ DhūñDe se kahīñ

jo nazar naqsh-ba-dīvār banā de mujh ko

tū hayūlā jo nahīñ hai to mire sāmne aa

gumbad-e-dard meñ chhup kar na sadā de mujh ko

KHushk lamhat ke dariya mein baha de mujh ko

marg-e-ehsas ki suli pe chaDha de mujh ko

kaun aa kar tere insaf ka misdaq bane

be-gunahi pe agar tu na saza de mujh ko

ek pal mein ye mera rang uDa dete hain

ras aate nahin KHush-rang libaade mujh ko

yun mujhe dekh ke chehra na chhupa hathon se

main tera jism-e-barahna hun qaba de mujh ko

na mili kucha-o-bazar mein DhunDe se kahin

jo nazar naqsh-ba-diwar bana de mujh ko

tu hayula jo nahin hai to mere samne aa

gumbad-e-dard mein chhup kar na sada de mujh ko