KHushk patton ki tarah shaKHon se gir jate hain hum

ḳhushk pattoñ kī tarah shāḳhoñ se gir jaate haiñ ham

vaqt kī gard-e-safar ban ke aḌe jaate haiñ ham

jaise sadiyoñ kī siyah-poshī muqaddar ban ga.ī

raushnī kā naam aate hī pighal jaate haiñ ham

is qadar raushan nahīñ thī aaj se pahle ġhazal

bhīgte lafzoñ ko sho.aloñ kī zabāñ dete haiñ ham

subah hotī hai to jaise ik haqīqat jaan kar

gum-shuda ḳhvāboñ kī ta.abīroñ ko apnāte haiñ ham

ye ghane lamhāt ye mauhūm āvāzoñ kā shor

DhūñD le ai sham-e-tanhā.ī ki kho jaate haiñ ham

jis tarah ik tifl-e-ḳhvābīda ho un āñkhoñ kī yaad

chauñk kar ḳhvāboñ se ik pal ko sambhal jaate haiñ ham

zindagī ko ahd-e-māzī kī rivāyat jaan kar

saf.ha-e-daurāñ se tahrīreñ miTā dete haiñ ham

KHushk patton ki tarah shaKHon se gir jate hain hum

waqt ki gard-e-safar ban ke aDe jate hain hum

jaise sadiyon ki siyah-poshi muqaddar ban gai

raushni ka nam aate hi pighal jate hain hum

is qadar raushan nahin thi aaj se pahle ghazal

bhigte lafzon ko shoalon ki zaban dete hain hum

subah hoti hai to jaise ek haqiqat jaan kar

gum-shuda KHwabon ki tabiron ko apnate hain hum

ye ghane lamhat ye mauhum aawazon ka shor

DhunD le ai sham-e-tanhai ki kho jate hain hum

jis tarah ek tifl-e-KHwabida ho un aankhon ki yaad

chaunk kar KHwabon se ek pal ko sambhal jate hain hum

zindagi ko ahd-e-mazi ki riwayat jaan kar

safha-e-dauran se tahriren miTa dete hain hum