KHushk roTi toDni hai sard pani chahiye

ḳhushk roTī toḌnī hai sard paanī chāhiye

kyā kisī girje kī kunDī khaTkhaTānī chāhiye

ai samā.at us fazā meñ aaj bhī maujūd hai

haañ navā-e-naġhma-e-kun tujh ko aanī chāhiye

kāhinā ham se rivāyat kā mukammal matn sun

batn meñ jaltī huī sham-e-ma.ānī chāhiye

sābiqa naqshe pe taaza saltanat ījād ho

āsmāñ niilā banānā ghaas dhānī chāhiye

gum-shuda sūraj ko rotā hai mirā yaum-e-saped

surma.ī shab ko charāġh-e-āñ-jahānī chāhiye

husn ke gaare meñ āb-e-ishq kī chhīñTeñ milā

champa.ī rañgat meñ ātish sansanānī chāhiye

jism kī gosha-nashīnī aur kitne roz hai

banda-e-rabb-e-alī ko lā-makānī chāhiye

KHushk roTi toDni hai sard pani chahiye

kya kisi girje ki kunDi khaTkhaTani chahiye

ai samaat us faza mein aaj bhi maujud hai

han nawa-e-naghma-e-kun tujh ko aani chahiye

kahina hum se riwayat ka mukammal matn sun

batn mein jalti hui sham-e-maani chahiye

sabiqa naqshe pe taza saltanat ijad ho

aasman nila banana ghas dhani chahiye

gum-shuda suraj ko rota hai mera yaum-e-saped

surmai shab ko charagh-e-an-jahani chahiye

husn ke gare mein aab-e-ishq ki chhinTen mila

champai rangat mein aatish sansanani chahiye

jism ki gosha-nashini aur kitne roz hai

banda-e-rabb-e-ali ko la-makani chahiye