KHub-ruyan-e-jahan chand ki tanwiren hain

ḳhūb-ruyān-e-jahāñ chāñd kī tanvīreñ haiñ

putliyāñ āñkhoñ kī raushan hoñ vo tasvīreñ haiñ

sher-goyoñ ko mazāmīn kī tauqīreñ haiñ

kahne ko ek zamīñ saikḌoñ jāgīreñ haiñ

yaar se hotī hai gustāḳh jo hotī ho so ho

zulfeñ hāthoñ meñ haiñ yā paañv meñ zanjīreñ haiñ

koī ādāb-e-mohabbat ko bhalā kyā jaa.e

zillateñ jitnī haiñ āshiq kī vo tauqīreñ haiñ

karūñ tauba jo ho paidā bun-e-har-mū se zabāñ

jitne haiñ mū-e-badan utnī hī taqsīreñ haiñ

vo bhaveñ maar utāreñge kisī din mujh ko

jin ke qabze meñ qazā hai ye vo shamshīreñ haiñ

qaul-e-haq par hue kab muttafiq ahl-e-duniyā

ek qur.ān hai jis kī ka.ī tafsīreñ haiñ

kyā yaqīñ aa.e mujhe hāl-e-bahisht-o-dozaḳh

maiñ huuñ jis ḳhvāb meñ sab us kī ye ta.abīreñ haiñ

saat dozaḳh kiye ḳhalq us ne karīmī us kī

ek hafte kī hamāre liye ta.azīreñ haiñ

chaar īñTeñ huiiñ kis ke na mahall-e-naḳhvat

maqbare aaj salātīn kī tāmīreñ haiñ

ek zarre ko jo qismat se na jumbish ho na ho

ḳhaak uḌāne ko to āñdhī mirī tadbīreñ haiñ

koī ḳhush-ḳhvān ho qāsid to bahut behtar hai

mere naame meñ tarāne kī bhī tahrīreñ haiñ

haDDiyāñ jism meñ jaltī haiñ palīte kī tarah

ishq ke ism-e-jalālī kī ye tāsīreñ haiñ

dil ko har-vaqt jo rahtī hai butoñ kī tasbīh

apne nāloñ ko samajhtā huuñ kī takbīreñ haiñ

'bahr' arzhañg-e-jahāñ kā na tamāshā.ī ho

jin kā saaya hai balā us meñ vo tasvīreñ haiñ

KHub-ruyan-e-jahan chand ki tanwiren hain

putliyan aankhon ki raushan hon wo taswiren hain

sher-goyon ko mazamin ki tauqiren hain

kahne ko ek zamin saikDon jagiren hain

yar se hoti hai gustaKH jo hoti ho so ho

zulfen hathon mein hain ya panw mein zanjiren hain

koi aadab-e-mohabbat ko bhala kya jae

zillaten jitni hain aashiq ki wo tauqiren hain

karun tauba jo ho paida bun-e-har-mu se zaban

jitne hain mu-e-badan utni hi taqsiren hain

wo bhawen mar utarenge kisi din mujh ko

jin ke qabze mein qaza hai ye wo shamshiren hain

qaul-e-haq par hue kab muttafiq ahl-e-duniya

ek quran hai jis ki kai tafsiren hain

kya yaqin aae mujhe haal-e-bahisht-o-dozaKH

main hun jis KHwab mein sab us ki ye tabiren hain

sat dozaKH kiye KHalq us ne karimi us ki

ek hafte ki hamare liye taziren hain

chaar inTen huin kis ke na mahall-e-naKHwat

maqbare aaj salatin ki tamiren hain

ek zarre ko jo qismat se na jumbish ho na ho

KHak uDane ko to aandhi meri tadbiren hain

koi KHush-KHwan ho qasid to bahut behtar hai

mere name mein tarane ki bhi tahriren hain

haDDiyan jism mein jalti hain palite ki tarah

ishq ke ism-e-jalali ki ye tasiren hain

dil ko har-waqt jo rahti hai buton ki tasbih

apne nalon ko samajhta hun ki takbiren hain

'bahr' arzhang-e-jahan ka na tamashai ho

jin ka saya hai bala us mein wo taswiren hain