KHugar-e-aish-o-masarrat dil-e-KHud-kaam nahin

ḳhūgar-e-aish-o-masarrat dil-e-ḳhud-kām nahīñ

hai ye ārām kī sūrat magar ārām nahīñ

maut laa.ī hai ye paiġhām ki is ghar se nikal

tū ne jo kaam kiye qābil-e-in.ām nahīñ

dā.imī ziist ho darkār to marnā sīkho

ye vo āġhāz hai jis kā koī anjām nahīñ

dekh kar hashr meñ nekī-o-badī kī fihrist

ishq hai sar-ba-garebāñ ki mirā naam nahīñ

log kahte haiñ ki vo pūchhte rahte haiñ magar

un kī jānib se to ab tak koī paiġhām nahīñ

kab ḳhudā jaane vo ḳhalvat se barāmad hoñge

mahfil-e-nāz abhī jalva-gah-e-ām nahīñ

is ko jis tarah banā.e koī ban jaatī hai

zindagī ḳhud sabab-e-rāhat-o-ālām nahīñ

KHugar-e-aish-o-masarrat dil-e-KHud-kaam nahin

hai ye aaram ki surat magar aaram nahin

maut lai hai ye paigham ki is ghar se nikal

tu ne jo kaam kiye qabil-e-inam nahin

daimi zist ho darkar to marna sikho

ye wo aaghaz hai jis ka koi anjam nahin

dekh kar hashr mein neki-o-badi ki fihrist

ishq hai sar-ba-gareban ki mera nam nahin

log kahte hain ki wo puchhte rahte hain magar

un ki jaanib se to ab tak koi paigham nahin

kab KHuda jaane wo KHalwat se baramad honge

mahfil-e-naz abhi jalwa-gah-e-am nahin

is ko jis tarah banae koi ban jati hai

zindagi KHud sabab-e-rahat-o-alam nahin