KHun-e-dil hai nikhaar kanTon par

ḳhūn-e-dil hai nikhār kāñToñ par

dekhtā jā bahār kāñToñ par

inqilāb-e-chaman kī baat karo

ham ne dekhī bahār kāñToñ par

merī dīvāngī bhī dekh chukī

dāman-e-tār-tār kāñToñ par

fasl-e-gul bhī guzār dī ham ne

ai ġham-e-rozgār kāñToñ par

dil kī be-ḳhvābiyāñ na jā.eñgī

niiñd aa.e hazār kāñToñ par

baat kyā hai ki us ke ġham kī tarah

lauTtī hai bahār kāñToñ par

haa.e vo chand husn-e-kār 'urūj'

jin ko aatā hai pyaar kāñToñ par

KHun-e-dil hai nikhaar kanTon par

dekhta ja bahaar kanTon par

inqilab-e-chaman ki baat karo

hum ne dekhi bahaar kanTon par

meri diwangi bhi dekh chuki

daman-e-tar-tar kanTon par

fasl-e-gul bhi guzar di hum ne

ai gham-e-rozgar kanTon par

dil ki be-KHwabiyan na jaengi

nind aae hazar kanTon par

baat kya hai ki us ke gham ki tarah

lauTti hai bahaar kanTon par

hae wo chand husn-e-kar 'uruj'

jin ko aata hai pyar kanTon par