KHun-e-dil mujhse tera rang-e-hina mange hai

ḳhūn-e-dil mujh se tirā rañg-e-hinā māñge hai

yā hathelī pe koī naqsh-e-vafā māñge hai

jo sadā detā rahā dār-o-rasan tohfe meñ

ham faqīroñ se vahī harf-e-duā māñge hai

kyā huā hai ki rifāqat kā bharam rakhne ko

mujh se mahbūb mirā zaḳhm nayā māñge hai

shahr meñ dhañstā hai fitne kī na.ī daldal meñ

kyā qayāmat hai ki merā hī pata māñge hai

kuchh samajh meñ nahīñ aatā hai mizāj-e-yārāñ

jis ko dekho vahī iz.hār-e-vafā māñge hai

vo to vahshat meñ kabhī samjhe hai mujh ko qātil

aur kabhī kūcha-e-qātil kā patā māñge hai

aql par parda paḌā hai ki suḳhnavar 'anjum'

din ke māhaul meñ bhī kaalī ridā māñge hai

KHun-e-dil mujh se tera rang-e-hina mange hai

ya hatheli pe koi naqsh-e-wafa mange hai

jo sada deta raha dar-o-rasan tohfe mein

hum faqiron se wahi harf-e-dua mange hai

kya hua hai ki rifaqat ka bharam rakhne ko

mujh se mahbub mera zaKHm naya mange hai

shahr mein dhansta hai fitne ki nai daldal mein

kya qayamat hai ki mera hi pata mange hai

kuchh samajh mein nahin aata hai mizaj-e-yaran

jis ko dekho wahi izhaar-e-wafa mange hai

wo to wahshat mein kabhi samjhe hai mujh ko qatil

aur kabhi kucha-e-qatil ka pata mange hai

aql par parda paDa hai ki suKHnawar 'anjum'

din ke mahaul mein bhi kali rida mange hai