KHun rulati rahi ek umr-e-shab-e-tar mujhe

ḳhuuñ rulātī rahī ik umr-e-shab-e-tār mujhe

tab kahīñ jā ke mile sub.h ke āsār mujhe

maiñ na yūsuf huuñ na ye shahr-e-zuleḳhā yaaro

kyoñ chale aa.e ho le kar sar-e-bāzār mujhe

ghar meñ laa.ī to hai betābī-e-dil dekh zarā

kahīñ pahchān na leñ ye dar-o-dīvār mujhe

maiñ to huuñ sarhad-e-imkāñ se guzarne vaalā

pā sakegī na kabhī vaqt kī raftār mujhe

tahī dāman huuñ magar ahl-e-havas ke aage

roktā hai lab-e-iz.hār se pindār mujhe

mere dushman to kabhī vaar na karte lekin

mere apnoñ ne safī' kar diyā lāchār mujhe

KHun rulati rahi ek umr-e-shab-e-tar mujhe

tab kahin ja ke mile subh ke aasar mujhe

main na yusuf hun na ye shahr-e-zuleKHa yaro

kyon chale aae ho le kar sar-e-bazar mujhe

ghar mein lai to hai betabi-e-dil dekh zara

kahin pahchan na len ye dar-o-diwar mujhe

main to hun sarhad-e-imkan se guzarne wala

pa sakegi na kabhi waqt ki raftar mujhe

tahi daman hun magar ahl-e-hawas ke aage

rokta hai lab-e-izhaar se pindar mujhe

mere dushman to kabhi war na karte lekin

mere apnon ne safi' kar diya lachaar mujhe