KHun ubalta dekha hai humne kisi naKHchir se

ḳhuuñ ubaltā dekhā hai ham ne kisī naḳhchīr se

jaane kyā nikle natīja ḳhvāb kī tā'bīr se

is shikast-e-fāsh se sābit hai ai ḳhanjar-ba-kaf

merī shah-rag tez-tar niklī tirī shamshīr se

aaj zer-e-nā-murādī huuñ vagarna bārhā

kaT gayā patthar kā siina mere TuuTe tiir se

dāstān-e-shām-e-ġham ne ab talak ḳhā.if rakhā

aur ab ham Dar rahe haiñ qissa-e-shab-gīr se

kar diyā ruḳhsat use de kar nasīhat āḳhirī

beTī mar jaanā magar shikva na ho taqdīr se

chāhiye hai ab bahar-sūrat sadā-e-ehtijāj

naġhma-e-pāzeb se uTThe yā phir zanjīr se

āsmāñ par rashk se jal bujh rahā thā māhtāb

ho rahī thī guftugū kal shab tirī tasvīr se

kyā zarūrī hai muharrir kā patā mā'lūm ho

chaliye bas pahchān liije shoḳhi-e-tahrīr se

nāla-e-dil us kā bhī ik she'r-e-shor-angez hai

vo suḳhanvar dars letā hai janāb-e-'mīr' se

KHun ubalta dekha hai hum ne kisi naKHchir se

jaane kya nikle natija KHwab ki ta'bir se

is shikast-e-fash se sabit hai ai KHanjar-ba-kaf

meri shah-rag tez-tar nikli teri shamshir se

aaj zer-e-na-muradi hun wagarna barha

kaT gaya patthar ka sina mere TuTe tir se

dastan-e-sham-e-gham ne ab talak KHaif rakha

aur ab hum Dar rahe hain qissa-e-shab-gir se

kar diya ruKHsat use de kar nasihat aaKHiri

beTi mar jaana magar shikwa na ho taqdir se

chahiye hai ab bahar-surat sada-e-ehtijaj

naghma-e-pazeb se uTThe ya phir zanjir se

aasman par rashk se jal bujh raha tha mahtab

ho rahi thi guftugu kal shab teri taswir se

kya zaruri hai muharrir ka pata ma'lum ho

chaliye bas pahchan lije shoKHi-e-tahrir se

nala-e-dil us ka bhi ek she'r-e-shor-angez hai

wo suKHanwar dars leta hai janab-e-'mir' se