KHwab aankhon ki gali chhoD ke jaane nikle

ḳhvāb āñkhoñ kī galī chhoḌ ke jaane nikle

ham idhar niiñd kī dīvār girāne nikle

dhuul raste kā muqaddar hai to rasta kyā hai

bas yahī baat zamāne ko batāne nikle

jab pahāḌoñ se milī daad hunar kī apne

dāstāñ ham bhī samundar ko sunāne nikle

rañg se rañg judā hone kā manzar dekhā

tīrgī aur shafaq sirf bahāne nikle

jab samundar pe chale ham to ye sahrā chup the

ab pahāḌī pe khaḌe haiñ to bulāne nikle

āsmāñ jis kī zamīñ hai vo parinda huuñ maiñ

jaane kyuuñ log yahāñ daam bichhāne nikle

koī chehra na de āvāz kisī lau se 'matīn'

shaam hote hī charāġhoñ ko bujhāne nikle

KHwab aankhon ki gali chhoD ke jaane nikle

hum idhar nind ki diwar girane nikle

dhul raste ka muqaddar hai to rasta kya hai

bas yahi baat zamane ko batane nikle

jab pahaDon se mili dad hunar ki apne

dastan hum bhi samundar ko sunane nikle

rang se rang juda hone ka manzar dekha

tirgi aur shafaq sirf bahane nikle

jab samundar pe chale hum to ye sahra chup the

ab pahaDi pe khaDe hain to bulane nikle

aasman jis ki zamin hai wo parinda hun main

jaane kyun log yahan dam bichhane nikle

koi chehra na de aawaz kisi lau se 'matin'

sham hote hi charaghon ko bujhane nikle