KHwab aisa ho ki chashm-e-KHwab ash-ash kar uThe

ḳhvāb aisā ho ki chashm-e-ḳhvāb ash-ash kar uThe

chāñd nikle niiñd kā nīlāb ash-ash kar uThe

shart jo tujh ko lagānī hai lagā le dostā

us ke jalve par agar mahtāb ash-ash kar uThe

piilī kurtī ho tirī āñchal ho dhānī rang kā

ruup terā dekh kar panjāb ash-ash kar uThe

dil kī betābi kā jab mazkūr ho ai ham-nashīñ

ḳhud zabān-e-hāl se sīmāb ash-ash kar uThe

jhuum uThe dil husn-e-fitrat kī numā.ish dekh kar

aadmī kī chashm-e-hairat-yāb ash-ash kar uThe

phuul nikleñ shāḳhchoñ se chhatriyāñ taane hue

bārishoñ meñ qit'a-e-ḳhush-āb ash-ash kar uThe

zahr meñ Duubī huī vo daad thī 'yāvar-azīm'

rashk ke maare hue ahbāb ash-ash kar uThe

KHwab aisa ho ki chashm-e-KHwab ash-ash kar uThe

chand nikle nind ka nilab ash-ash kar uThe

shart jo tujh ko lagani hai laga le dosta

us ke jalwe par agar mahtab ash-ash kar uThe

pili kurti ho teri aanchal ho dhani rang ka

rup tera dekh kar panjab ash-ash kar uThe

dil ki betabi ka jab mazkur ho ai ham-nashin

KHud zaban-e-haal se simab ash-ash kar uThe

jhum uThe dil husn-e-fitrat ki numaish dekh kar

aadmi ki chashm-e-hairat-yab ash-ash kar uThe

phul niklen shaKHchon se chhatriyan tane hue

barishon mein qit'a-e-KHush-ab ash-ash kar uThe

zahr mein Dubi hui wo dad thi 'yawar-azim'

rashk ke mare hue ahbab ash-ash kar uThe