KHwab ho KHwab mein aate ho chale jate ho

ḳhvāb ho ḳhvāb meñ aate ho chale jaate ho

diid kā jaam luñDhāte ho chale jaate ho

kisī ummīd pe duniyā meñ mujhe zinda rakho

aate ho aas bañdhāte ho chale jaate ho

merī āñkhoñ meñ jo lāsha hai mire ḳhvāboñ kā

is pe rote ho rulāte ho chale jaate ho

qissa-e-dard kisī taur na bhūle mujh ko

roz aate ho sunāte ho chale jaate ho

kyuuñ mirī āñkhoñ meñ har roz na.e aas ke phuul

dosto aa ke khilāte ho chale jaate ho

mere zaḳhmoñ ke liye laao naañ marham bhī kabhī

in pe bas jashn manāte ho chale jaate ho

raah bhūle na koī dasht kā raahī 'tāriq'

is liye diip jalāte ho chale jaate ho

KHwab ho KHwab mein aate ho chale jate ho

did ka jam lunDhate ho chale jate ho

kisi ummid pe duniya mein mujhe zinda rakho

aate ho aas bandhate ho chale jate ho

meri aankhon mein jo lasha hai mere KHwabon ka

is pe rote ho rulate ho chale jate ho

qissa-e-dard kisi taur na bhule mujh ko

roz aate ho sunate ho chale jate ho

kyun meri aankhon mein har roz nae aas ke phul

dosto aa ke khilate ho chale jate ho

mere zaKHmon ke liye lao nan marham bhi kabhi

in pe bas jashn manate ho chale jate ho

rah bhule na koi dasht ka rahi 'tariq'

is liye dip jalate ho chale jate ho