KHwab jo dekhe hain maine unhen paikar dega

ḳhvāb jo dekhe haiñ maiñ ne unheñ paikar degā

merā sahrā mujhe ik roz samundar degā

ek qatra jo laraztā hai mirī palkoñ par

zard mausam ko yahī qatra harā kar degā

mujh ko kuchh aur fazāoñ meñ bikhar jaane do

merā ehsās ḳhalāoñ meñ mujhe ghar degā

huuñ gunahgār magar itnā gunahgār nahīñ

mujh ko degā bhī to vo phuul sā patthar degā

sochtā huuñ to thakan aur bhī baḌh jaatī hai

phir mujhe izn-e-safar harf-e-mukarrar degā

isī aalam meñ mire ḳhvāboñ kī duniyā bhī hai

merī duniyā ko bhī vaqt ek payambar degā

mere hamrāz mire dost mire saath na chal

lamha lamha tujhe āvāz kī Thokar degā

KHwab jo dekhe hain main ne unhen paikar dega

mera sahra mujhe ek roz samundar dega

ek qatra jo larazta hai meri palkon par

zard mausam ko yahi qatra hara kar dega

mujh ko kuchh aur fazaon mein bikhar jaane do

mera ehsas KHalaon mein mujhe ghar dega

hun gunahgar magar itna gunahgar nahin

mujh ko dega bhi to wo phul sa patthar dega

sochta hun to thakan aur bhi baDh jati hai

phir mujhe izn-e-safar harf-e-mukarrar dega

isi aalam mein mere KHwabon ki duniya bhi hai

meri duniya ko bhi waqt ek payambar dega

mere hamraaz mere dost mere sath na chal

lamha lamha tujhe aawaz ki Thokar dega