KHwab ka chehra pila paDte dekha hai

ḳhvāb kā chehra piilā paḌte dekhā hai

ik tā'bīr ko suulī chaḌhte dekhā hai

ik tasvīr jo ā.īne meñ dekhī thī

us kā ik ik naqsh bigaḌte dekhā hai

sub.h se le kar shaam talak un āñkhoñ ne

apne hī saa.e ko baḌhte dekhā hai

us se haal chhupānā to hai nā-mumkin

ham ne us ko āñkheñ paḌhte dekhā hai

ashk-e-ravāñ rakhnā hī achchhā hai varna

tālāboñ kā paanī saḌte dekhā hai

ik ummīd ko ham ne aksar ḳhalvat meñ

ek adhūrī mūrat gaḌhte dekhā hai

dil meñ koī hai jis ko aksar ham ne

har ilzām hamīñ par maḌhte dekhā hai

KHwab ka chehra pila paDte dekha hai

ek ta'bir ko suli chaDhte dekha hai

ek taswir jo aaine mein dekhi thi

us ka ek ek naqsh bigaDte dekha hai

subh se le kar sham talak un aankhon ne

apne hi sae ko baDhte dekha hai

us se haal chhupana to hai na-mumkin

hum ne us ko aankhen paDhte dekha hai

ashk-e-rawan rakhna hi achchha hai warna

talabon ka pani saDte dekha hai

ek ummid ko hum ne aksar KHalwat mein

ek adhuri murat gaDhte dekha hai

dil mein koi hai jis ko aksar hum ne

har ilzam hamin par maDhte dekha hai