KHwab mein bhi nazar aa jae jo ghar ki surat

ḳhvāb meñ bhī nazar aa jaa.e jo ghar kī sūrat

phaaḌ khā.eñ tire darbāñ sag-e-dar kī sūrat

aisī bigḌe na ilāhī kisī ghar kī sūrat

vahī dīvār kī sūrat hai jo dar kī sūrat

par-shikasta huuñ tah-e-shāḳh paḌā rahne de

bāġhbāñ tū mujhe TuuTe hue par kī sūrat

chhūTtā hī nahīñ ab arsh-e-ḳhudā bām-e-butāñ

dekh lī hai kahīñ nāloñ ne asar kī sūrat

ghere rahtā hai bagūlā mujhe ab ek na ek

kī hai paidā mire sahrā ne bhī ghar kī sūrat

jaan jaa.e ki rahe aap ke aate aate

aur se aur hai ab dard-e-jigar kī sūrat

paanī ho jaate haiñ aañsū mire motī ban kar

varna achchhī to na thī un se guhar kī sūrat

kūcha-e-zulf meñ jaate hue dil Dartā hai

har qadam par hai na.ī ḳhauf-o-ḳhatar kī sūrat

kabhī phūlā na phulā naḳhl-e-tamannā afsos

phuul kī shakl na dekhī na samar kī sūrat

ġhair kī qabr hai gulshan hai na dāman un kā

mujh se dekhī nahīñ jaatī gul-e-tar kī sūrat

chāragar aate haiñ to aañkh churā jaate haiñ

aisī bigḌī hai mire zaḳhm-e-jigar kī sūrat

āshiyāne ko chale baaġh meñ muddat guzrī

phirtī hai aañkh meñ kyuuñ barq-o-sharar kī sūrat

ghar se be-fikr maiñ sahrā meñ phirā kartā huuñ

merī āñkhoñ meñ phirā kartī hai ghar kī sūrat

qais bhaTkā thā ki sahrā meñ 'riyāz' aa.e nazar

rahnumā us ke bane aap ḳhizar kī sūrat

KHwab mein bhi nazar aa jae jo ghar ki surat

phaD khaen tere darban sag-e-dar ki surat

aisi bigDe na ilahi kisi ghar ki surat

wahi diwar ki surat hai jo dar ki surat

par-shikasta hun tah-e-shaKH paDa rahne de

baghban tu mujhe TuTe hue par ki surat

chhuTta hi nahin ab arsh-e-KHuda baam-e-butan

dekh li hai kahin nalon ne asar ki surat

ghere rahta hai bagula mujhe ab ek na ek

ki hai paida mere sahra ne bhi ghar ki surat

jaan jae ki rahe aap ke aate aate

aur se aur hai ab dard-e-jigar ki surat

pani ho jate hain aansu mere moti ban kar

warna achchhi to na thi un se guhar ki surat

kucha-e-zulf mein jate hue dil Darta hai

har qadam par hai nai KHauf-o-KHatar ki surat

kabhi phula na phula naKHl-e-tamanna afsos

phul ki shakl na dekhi na samar ki surat

ghair ki qabr hai gulshan hai na daman un ka

mujh se dekhi nahin jati gul-e-tar ki surat

chaaragar aate hain to aankh chura jate hain

aisi bigDi hai mere zaKHm-e-jigar ki surat

aashiyane ko chale bagh mein muddat guzri

phirti hai aankh mein kyun barq-o-sharar ki surat

ghar se be-fikr main sahra mein phira karta hun

meri aankhon mein phira karti hai ghar ki surat

qais bhaTka tha ki sahra mein 'riyaz' aae nazar

rahnuma us ke bane aap KHizar ki surat