KHwab mein ye kaise manzar aa gae

ḳhvāb meñ ye kaise manzar aa ga.e

niiñd meñ ham ghar se bāhar aa ga.e

dil kā darvāza zarā sā kyā khulā

ġham zamāne bhar ke andar aa ga.e

paañv meñ bāñdhe hue mere hī ḳhat

lauT kar mere kabūtar aa ga.e

tīrgī ghar kī miTāne ke liye

taaq meñ ham ḳhud ko rakh kar aa ga.e

ye akele ghar meñ kyā karte bhalā

ġham ko le ke saath daftar aa ga.e

maiñ ne tīroñ par nazar rakkhī thī 'ramz'

vaar karne ab ke ḳhanjar aa ga.e

KHwab mein ye kaise manzar aa gae

nind mein hum ghar se bahar aa gae

dil ka darwaza zara sa kya khula

gham zamane bhar ke andar aa gae

panw mein bandhe hue mere hi KHat

lauT kar mere kabutar aa gae

tirgi ghar ki miTane ke liye

taq mein hum KHud ko rakh kar aa gae

ye akele ghar mein kya karte bhala

gham ko le ke sath daftar aa gae

main ne tiron par nazar rakkhi thi 'ramz'

war karne ab ke KHanjar aa gae