KHwab nahin hai sannaTa hai lekin hai tabir bahut

ḳhvāb nahīñ hai sannāTā hai lekin hai ta.abīr bahut

sachchī bāteñ kam kam haiñ aur jhuuT kī hai tash.hīr bahut

kyā kyā chehre haiñ āñkhoñ meñ shakleñ kyā kyā zehn meñ haiñ

yādeñ goyā album haiñ aur album meñ tasvīr bahut

qissa hai bas do-pal kā ye milne aur bichhaḌne kā

karne vaale ishq kī yuuñ to karte haiñ tafsīr bahut

ham to sāhab-e-ahl-e-junūñ haiñ duniyā khel-tamāshā hai

ahl-e-ḳhirad kī ḳhātir hogī duniyā kī zanjīr bahut

saarī shakleñ dhundlī dhundlī mub.ham sā hai manzar bhī

ḳhvāb kī kachchī buniyādoñ par karnī hai ta.amīr bahut

qissa ye mahdūd na thā kuchh hoñToñ kī ḳhāmoshī tak

kahne ko to kahtī thī un āñkhoñ kī tahrīr bahut

KHwab nahin hai sannaTa hai lekin hai tabir bahut

sachchi baaten kam kam hain aur jhuT ki hai tashhir bahut

kya kya chehre hain aankhon mein shaklen kya kya zehn mein hain

yaaden goya album hain aur album mein taswir bahut

qissa hai bas do-pal ka ye milne aur bichhaDne ka

karne wale ishq ki yun to karte hain tafsir bahut

hum to sahab-e-ahl-e-junun hain duniya khel-tamasha hai

ahl-e-KHirad ki KHatir hogi duniya ki zanjir bahut

sari shaklen dhundli dhundli mubham sa hai manzar bhi

KHwab ki kachchi buniyaadon par karni hai tamir bahut

qissa ye mahdud na tha kuchh honTon ki KHamoshi tak

kahne ko to kahti thi un aankhon ki tahrir bahut