KHwab-o-KHayal-e-gul se kidhar jae aadmi

ḳhvāb-o-ḳhayāl-e-gul se kidhar jaa.e aadmī

ik gulshan-e-havā hai jidhar jaa.e aadmī

dekhe hue se lagte haiñ raste makāñ makīñ

jis shahr meñ bhaTak ke jidhar jaa.e aadmī

dekhe haiñ vo nagar ki abhī tak huuñ ḳhauf meñ

vo sūrateñ milī haiñ ki Dar jaa.e aadmī

ye bahr-e-hast-o-būd hai be-gauhar-e-murād

gahrā.iyoñ meñ is kī agar jaa.e aadmī

parde meñ rañg-o-bū ke safar-dar-safar 'munīr'

in manziloñ se kaise guzar jaa.e aadmī

KHwab-o-KHayal-e-gul se kidhar jae aadmi

ek gulshan-e-hawa hai jidhar jae aadmi

dekhe hue se lagte hain raste makan makin

jis shahr mein bhaTak ke jidhar jae aadmi

dekhe hain wo nagar ki abhi tak hun KHauf mein

wo suraten mili hain ki Dar jae aadmi

ye bahr-e-hast-o-bud hai be-gauhar-e-murad

gahraiyon mein is ki agar jae aadmi

parde mein rang-o-bu ke safar-dar-safar 'munir'

in manzilon se kaise guzar jae aadmi