KHwab-o-KHayal ho gae yarane kis tarah

ḳhvāb-o-ḳhayāl ho ga.e yārāne kis tarah

pal-bhar meñ log ban ga.e anjāne kis tarah

kyuuñ kar ḳhulūs-o-shauq meñ badleñgī nafrateñ

ye fāsle miTeñge ḳhudā jaane kis tarah

bolo zabāñ se tum na koī guftugū karo

dil kā tumhāre haal koī jaane kis tarah

maiñ kyā ki ek chehra huuñ jamm-e-ġhafīr meñ

vo mujh ko is hujūm meñ pahchāne kis tarah

majnūñ to ek naam thā gard-o-ġhubār kā

dil meñ basā liyā use lailā ne kis tarah

ḳhud apne hī vajūd se vahshat-zada haiñ log

ābādiyoñ meñ aa ga.e vīrāne kis tarah

iqbāl tum ne jo bhī kahā sach kahā magar

sach baat bhī tumhārī koī maane kis tarah

KHwab-o-KHayal ho gae yarane kis tarah

pal-bhar mein log ban gae anjaane kis tarah

kyun kar KHulus-o-shauq mein badlengi nafraten

ye fasle miTenge KHuda jaane kis tarah

bolo zaban se tum na koi guftugu karo

dil ka tumhaare haal koi jaane kis tarah

main kya ki ek chehra hun jamm-e-ghafir mein

wo mujh ko is hujum mein pahchane kis tarah

majnun to ek nam tha gard-o-ghubar ka

dil mein basa liya use laila ne kis tarah

KHud apne hi wajud se wahshat-zada hain log

aabaadiyon mein aa gae virane kis tarah

iqbaal tum ne jo bhi kaha sach kaha magar

sach baat bhi tumhaari koi mane kis tarah