KHwab se hai kab alag ye zindagani dekhiye

ḳhvāb se hai kab alag ye zindagānī dekhiye

film ke parde pe chaltī hai kahānī dekhiye

āsmāñ sūraj qamar taare zamīn-o-kahkashāñ

ye jahān-e-rang hai is kī nishānī dekhiye

kasb kā hāsil kahāñ ye fazl rab kā jāniye

pahle kab sheroñ meñ thī aisī ravānī dekhiye

haiñ qamar kī manzileñ yā phir zamīñ kī gardisheñ

vaqt kī tārīf kyā dariyā kā paanī dekhiye

kaun hai vo jis talak dast-e-qazā pahuñchā nahīñ

kahkashāñ shams-o-qamar ye sab haiñ faanī dekhiye

nā-murādī kāmrānī zindagī ke baad hai

zindagī ke roz-o-shab haiñ imtihānī dekhiye

KHwab se hai kab alag ye zindagani dekhiye

film ke parde pe chalti hai kahani dekhiye

aasman suraj qamar tare zamin-o-kahkashan

ye jahan-e-rang hai is ki nishani dekhiye

kasb ka hasil kahan ye fazl rab ka jaaniye

pahle kab sheron mein thi aisi rawani dekhiye

hain qamar ki manzilen ya phir zamin ki gardishen

waqt ki tarif kya dariya ka pani dekhiye

kaun hai wo jis talak dast-e-qaza pahuncha nahin

kahkashan shams-o-qamar ye sab hain fani dekhiye

na-muradi kaamrani zindagi ke baad hai

zindagi ke roz-o-shab hain imtihani dekhiye