KHwab sitare hote honge lekin aankhen ret

ḳhvāb sitāre hote hoñge lekin āñkheñ ret

din dariyāoñ ke ham-jolī haiñ aur rāteñ ret

ek faqīr ne merī jānib dekhā aur phir maiñ

miTTī kī Dherī kī sūrat thā aur sāñseñ ret

maiñ sarsabz jazīre jaisā thā par dasht huā

us ne mujh se itnā kahā thā terī bāteñ ret

motī TūTne lagte haiñ jab patthar baat kareñ

ā.īnoñ ko dukh hotā hai jab ham boleñ ret

kabhī kabhī jī chāhtā hai ki tanhā kamre meñ

ham kāġhaz par ashk banā.eñ aur phir likkheñ ret

'zāhid' raat kī ḳhāmoshī meñ koī kahtā hai

dānish-vānish aqleñ-vaqleñ socheñ-vohcheñ ret

KHwab sitare hote honge lekin aankhen ret

din dariyaon ke ham-joli hain aur raaten ret

ek faqir ne meri jaanib dekha aur phir main

miTTi ki Dheri ki surat tha aur sansen ret

main sarsabz jazire jaisa tha par dasht hua

us ne mujh se itna kaha tha teri baaten ret

moti TuTne lagte hain jab patthar baat karen

aainon ko dukh hota hai jab hum bolen ret

kabhi kabhi ji chahta hai ki tanha kamre mein

hum kaghaz par ashk banaen aur phir likkhen ret

'zahid' raat ki KHamoshi mein koi kahta hai

danish-wanish aqlen-waqlen sochen-wohchen ret