خوابوں کی دنیا پھر سے دکھلا دو اماں

خوابوں کی دنیا پھر سے دکھلا دو اماں

سونے جاگنے والی گڑیا لا دو اماں

میں دنیا کی چالاکی کو جان نا پاؤں

مجھ کو میرا بھولا پن لوٹا دو اماں

ہر چہرے کے پیچھے اک چہرہ دکھتا ہے

دل کی آنکھوں سے یہ بھید چھپا دو اماں

دنیا کو خوش کرتے کرتے تھک جاتی ہوں

ہونٹوں پر سچی مسکان سجا دو اماں

دھوپ اگے تو کوئی پھول نہیں کھلتا ہے

آنگن کے ان پودوں کو یہ سجھا دو اماں

جب تم نے ہم سب کو اک ہی لہو پلایا

رنگ برنگے کیوں ہیں ہم بتلا دو اماں

نیند کہاں کی خوابوں سے اب کیسا رشتہ

خالی لوری دے کر ہی بہلا دو اماں

آنکھوں کے آئینوں میں دھندلا پن کیوں ہے

بھولے سے ہی دل کی بات بتا دو اماں